Ўзбекистон ва АҚШ 12 млрд долларлик
келишувларни имзолади. Wabtec темирйўл техникаси ишлаб чиқаришни
маҳаллийлаштиришга, Franklin Templeton, Oppenheimer & Co., Citigroup
ва BlackRock эса маҳаллий компанияларнинг халқаро капитал бозорларига
чиқишига кўмаклашади.
АҚШ делегациясининг Ўзбекистонга
ташрифи доирасида савдо, инвестиция ва технологик ҳамкорлик соҳаларида 54
та келишувдан иборат пакет имзоланди. Уларни амалга ошириш учун 12 млрд
доллар ўзлаштирилиши режалаштирилган. Бу ҳақда Инвестициялар, саноат
ва савдо вазирлиги матбуот хизмати хабар берди.
Келишувлар саноат, транспорт
ва энергетика инфратузилмаси, муҳим минераллар, молия сектори, рақамли
технологиялар, қишлоқ хўжалиги, соғлиқни сақлаш ва таълим соҳаларини
қамраб олади.
Wabtec билан ташаббуслар темирйўл
техникаси ва бутловчи қисмлар ишлаб чиқаришни маҳаллийлаштиришга
қаратилган.
Franklin Templeton, Oppenheimer
& Co., Citigroup ва BlackRock билан келишувлар миллий компанияларнинг
халқаро капитал бозорларига чиқиши, институционал инвесторларни жалб этиш
ва инфратузилма лойиҳаларини молиялаштиришга қаратилган.
Кончилик соҳасида ReElement
Technologies, Traxys ва Trafigura билан келишувлар конларни ўрганиш ва ўзлаштириш, технологик ҳамкорлик ҳамда минерал ресурсларни етказиб бериш билан боғлиқ. Шунингдек, Ўзбекистоннинг муҳим
минераллар соҳасидаги салоҳиятини ривожлантириш кўзда тутилган.
Amazon Leo билан ташаббуслар сунъий
йўлдош алоқасини ривожлантириш, GE HealthCare билан келишувлар замонавий
тиббий технологияларни жорий этиш, Valmont Industries билан ҳамкорлик эса
қишлоқ хўжалиги самарадорлигини оширишни назарда тутади.
Инвестициялар, саноат ва савдо
вазирлиги маълумотига кўра, бизнес дастурда 400 дан ортиқ компания вакиллари
қатнашган: уларнинг 100 дан ортиғи АҚШдан, 100 таси Марказий Осиёнинг бошқа
мамлакатларидан ва 200 таси Ўзбекистон корхоналаридан.
gazeta.uz
Сарлавха :
Иқтисодиёт
21 10 2026 / 13:56